തിരുവനന്തപുരം: വിദ്യാർഥികളിൽ ശാരീരിക ക്ഷമതയും മാനസിക ആരോഗ്യവും ഉറപ്പാക്കാൻ സ്കൂളുകളിൽ ആരംഭിക്കുന്ന സൂംബ ഡാൻസ് പാഠ്യപദ്ധതിയുടെ ഭാഗമാക്കി. ഇതിന്റെ ഭാഗമായി എട്ടാം ക്ലാസിലെ കലാപഠനം പാഠപുസ്തകത്തിൽ സൂംബ ഡാൻസ് ഉൾപ്പെടുത്തി. പുതിയ അധ്യായന വർഷം സ്കൂളുകളിൽ കുട്ടികളെ ഈ ഡാൻസ് പ്രാക്ടീസ് ചെയ്യിക്കാനായി മുഴുവൻ അധ്യാപകർക്കും പരിശീലനം ആരംഭിച്ചു. ലഹരി വിരുദ്ധ പ്രവർത്തനങ്ങളുടെ ഭാഗമായി മുഴുവൻ കുട്ടികളെയും സ്കൂളുകളിൽ സൂംബ ഡാൻസ് ചെയ്യിക്കാൻ മുഖ്യമന്ത്രി പിണറായി വിജയൻ നിർദ്ദേശം നൽകിയിരുന്നു. ഇതിന്റെ ഭാഗമായാണ് ഡാൻസ് പാഠപദ്ധതിയിൽ ഉൾപ്പെടുത്തിയത്. അടുത്തദിവസം പാഠപുസ്തകം കുട്ടികളുടെ കൈകളിലെത്തും.
നൃത്തവും ഫിറ്റ്നസ് വർക്കൗട്ടും ഒരുമിക്കുന്ന ഡാൻസ് ജനപ്രിയ നൃത്തങ്ങൾ എന്ന പാഠഭാഗത്തിലാണ് ചിത്രം സഹിതം പഠിപ്പിക്കുന്നത് . അതിന്റെ ഉത്ഭവവും മറ്റു വിവരങ്ങളും ഉണ്ട്. ബ്രേക്ക് ഡാൻസിനെ കുറിച്ചും ഈ പാഠഭാഗത്ത് പഠിപ്പിക്കുന്നുണ്ട് . ഡാൻസ് ബീറ്റുകൾക്കൊപ്പം സൂംബ ഡാൻസ് ചെയ്യാനും പരിശീലിപ്പിക്കുന്നുണ്ട്. ലഹരി വിരുദ്ധ പ്രവർത്തനം ശക്തിപ്പെടുത്തുന്നതിനായി മുഖ്യമന്ത്രി വിളിച്ചുചേർത്ത ഉന്നത തല യോഗത്തിലാണ് കുട്ടികളെ പരിശീലിപ്പിക്കാനും എല്ലാദിവസവും അവർ നൃത്തം ചെയ്യാനുമുള്ള സംവിധാനം സ്കൂളുകളിൽ ഒരുക്കാനും അദ്ദേഹം നിർദ്ദേശം നൽകിയത്.
