പെരുങ്കള്ളൻ ബാലമുരുകന് കസ്റ്റഡിയില് നിന്ന് രക്ഷപ്പെട്ട സംഭവം; തമിഴ്നാട് പൊലീസിലെ മൂന്ന് ഉദ്യോഗസ്ഥര്ക്ക് സസ്പെന്ഷന്
കുപ്രസിദ്ധ മോഷ്ടാവ് ബാലമുരുകന് കസ്റ്റഡിയില് നിന്ന് രക്ഷപ്പെട്ടതില് തമിഴ്നാട് പൊലീസിലെ മൂന്ന് ഉദ്യോഗസ്ഥര്ക്ക് സസ്പെന്ഷന്. തമിഴ്നാട് വിരുതനഗര് ജില്ലയിലെ ബന്ദല്ക്കുടി സ്റ്റേഷനിലെ എസ് ഐ നാഗരാജന് അടക്കം മൂന്ന് ഉദ്യോഗസ്ഥരെയാണ് സസ്പെന്ഡ് ചെയ്തത്. പ്രതി ചാടിപ്പോയതില് തമിഴ്നാട് പൊലീസിന്റെ ഭാഗത്ത് നിന്നും ഗുരുതര വീഴ്ചയുണ്ടായെന്നാണ് റിപ്പോര്ട്ട്.
തെളിവെടുപ്പിന് കൊണ്ടുപോയ പ്രതിയെ സ്വകാര്യ കാറില് തിരികെയെത്തിച്ചതും കൈവിലങ്ങണിയിക്കാതെ പുറത്തുവിട്ടതും കടുത്ത വീഴ്ചയാണെന്ന് കണ്ടെത്തി. ബാലമുരുകന് രക്ഷപ്പെട്ടത് തമിഴ്നാട് പൊലീസ് കേരള പൊലീസിനെ അറിയിക്കാന് വൈകിയതും വീഴ്ചയായി കണ്ടു. ബാലമുരുകന് കസ്റ്റഡിയില്നിന്നും രക്ഷപ്പെട്ട് ഏകദേശം ഒരു മണിക്കൂര് കഴിഞ്ഞാണ് തമിഴ്നാട് പൊലീസ് വിയ്യൂര് പൊലീസിനെ അറിയിച്ചത്. വിലങ്ങില്ലാതെ പ്രതിയുമായി തമിഴ്നാട് പൊലീസ് ആലത്തൂരിലെ ഹോട്ടലില് എത്തിയതിൻ്റെ സിസിടിവി ദൃശ്യങ്ങള് പുറത്തുവന്നിരുന്നു. പ്രതി രക്ഷപ്പെട്ടതില് തമിഴ്നാട് പൊലീസിൻ്റെ വീഴ്ച തെളിയിക്കുന്നതായിരുന്നു സിസിടിവി ദൃശ്യങ്ങള്.
അതേസമയം ബാലമുരുകനായി, തെങ്കാശിയും പൊള്ളാച്ചിയും കേന്ദ്രീകരിച്ച് അന്വേഷണം പുരോഗമിക്കുകയാണ്. കവര്ച്ച, കൊലപാതക ശ്രമം ഉള്പ്പെടെ 53 കേസുകളില് ഇയാള് പ്രതിയാണ്. ബാലമുരുകനെതിരെ തമിഴ്നാട്ടില് രജിസ്റ്റര് ചെയ്ത കേസില് കോടതിയില് ഹാജരാക്കി വിയ്യൂരിലേക്ക് കൊണ്ടുവരുന്നതിനിടെയാണ് പ്രതി കസ്റ്റഡിയില് നിന്നും ചാടിപ്പോയത്.
