കേന്ദ്ര ഫിഷറീസ്-മൃഗസംരക്ഷണ-ക്ഷീരവികസന മന്ത്രാലയത്തിന് കീഴിലെ ഫിഷറീസ് വകുപ്പ് സീഷെൽസിലെ ഉന്നതതല പ്രതിനിധി സംഘവുമായി ഓഗസ്റ്റ് 25-ന് ഉന്നതതല ഉഭയകക്ഷി യോഗം ചേര്‍ന്നു. സീഷെൽസ് ഫിഷറീസ്-കൃഷി-സമുദ്ര സമ്പദ്‍ വ്യവസ്ഥ മന്ത്രി വാലസ് കോസ്‌ഗ്രോവ് സീഷെൽസ് സംഘത്തിനും ഫിഷറീസ് വകുപ്പ് സെക്രട്ടറി ഡോ. അഭിലാക്ഷ് ലിഖി ഇന്ത്യൻ പ്രതിനിധി സംഘത്തിനും നേതൃത്വം നല്‍കി. നിലവിലെ സഹകരണ ചട്ടക്കൂടുകൾ അവലോകനം ചെയ്യാനും പരസ്പരം താൽപ്പര്യമുള്ള പുതിയ മേഖലകൾ കണ്ടെത്താനും സുസ്ഥിര സമുദ്രവിഭവ വിനിയോഗത്തിന് ശക്തമായ സംയുക്ത മാർഗരേഖ തയ്യാറാക്കാനും ലക്ഷ്യമിട്ട യോഗത്തിൽ ഇരുരാജ്യങ്ങളിലെയും മുതിർന്ന ഉദ്യോഗസ്ഥരും സ്ഥാപന പ്രതിനിധികളും പങ്കെടുത്തു.
സീഷെൽസ് പ്രതിനിധി സംഘത്തെ സ്വാഗതം ചെയ്ത ഇന്ത്യൻ നേതൃത്വം ഇരുരാജ്യങ്ങളും തമ്മിലെ ആഴമേറിയ സമുദ്ര പങ്കാളിത്തം എടുത്തുപറഞ്ഞു. ഫിഷറീസ്, ജലകൃഷി, നൂതന ശാസ്ത്ര ഗവേഷണം, ശേഷിവികസനം എന്നീ മേഖലകളിൽ സാങ്കേതിക സഹകരണം വിപുലീകരിക്കുന്നതിലെ ഉറച്ച പ്രതിബദ്ധത ഇന്ത്യ യോഗത്തിൽ ആവർത്തിച്ചു. ഇന്ത്യൻ മഹാസമുദ്ര മേഖലയിലുടനീളം സാമൂഹ്യ-സാമ്പത്തിക സ്ഥിരതയും ഭക്ഷ്യ-പോഷകാഹാര സുരക്ഷയും ഉറപ്പാക്കാൻ ഇരുരാജ്യങ്ങളും തമ്മിലെ അടുത്ത സഹകരണം അത്യന്താപേക്ഷിതമാണെന്ന് ഇരുവിഭാഗവും ചൂണ്ടിക്കാട്ടി.
