കോഴിക്കോട്: നിലമ്പൂര് ഉപതിരഞ്ഞെടുപ്പില് കോണ്ഗ്രസ് സ്ഥാനാര്ഥി ആര്യാടന് ഷൗക്കത്ത് വിജയിച്ചതിന് പിന്നാലെ വൈകാരിക ഫെയ്സ്ബുക്ക് പോസ്റ്റുമായി മലപ്പുറം മുന്ഡിസിസി പ്രസിഡൻ്റ് വി.വി. പ്രകാശിൻ്റെ മകള് നന്ദന പ്രകാശ്. ‘അച്ഛാ നമ്മള് ജയിച്ചൂട്ടോ’, എന്ന വാക്കുകളാണ് നന്ദന ഫെയ്സ്ബുക്കില് പങ്കുവെച്ചത്. ‘അന്നും ഇന്നും എന്നും പാര്ട്ടിക്കൊപ്പം’, എന്നും നന്ദന, വി.വി. പ്രകാശിൻ്റെ ഫോട്ടോയ്ക്കുതാഴെ നില്ക്കുന്ന ചിത്രത്തിനൊപ്പം കുറിച്ചു.
നിലമ്പൂര് ഉപതിരഞ്ഞെടുപ്പ് പ്രഖ്യാപനത്തിന് പിന്നാലെ പലതവണ നന്ദന പ്രകാശിൻ്റെ ഫെയ്സ്ബുക്ക് പോസ്റ്റുകള് ചര്ച്ചയായിരുന്നു. കോണ്ഗ്രസ് സ്ഥാനാര്ഥിയായി ആര്യാടന് ഷൗക്കത്തിനെ പരിഗണിക്കുന്നുവെന്ന വാര്ത്തകള്ക്കുപിന്നാലെ, ജീവിച്ചുമരിച്ച അച്ഛനേക്കാള് ശക്തിയുണ്ട് മരിച്ചിട്ടും എൻ്റെ മനസില് ജീവിക്കുന്ന അച്ഛന്’, എന്ന നന്ദനയുടെ കുറിപ്പ് വലിയ ചര്ച്ചയായി. ‘ശരീരം വിട്ടുപിരിഞ്ഞെങ്കിലും അച്ഛൻ്റെ പച്ചപിടിച്ച ഓര്മ്മകള് ഓരോ നിലമ്പൂര്ക്കാരുടേയും മനസില് എരിയുന്നുണ്ട്. അതൊരിക്കലും കെടാത്ത തീയായി പടര്ന്നുകൊണ്ടിരിക്കും’, എന്നും അന്ന് നന്ദന കുറിച്ചു.
വോട്ടെടുപ്പ് ദിവസം, വി.വി. പ്രകാശ് ഇല്ലാത്ത ആദ്യത്തെ തിരഞ്ഞെടുപ്പാണെന്ന് ഓര്മിപ്പിച്ചും നന്ദന പോസ്റ്റിട്ടിരുന്നു. യുഡിഎഫ് സ്ഥാനാര്ഥി വി.വി. പ്രകാശിൻ്റെ വീട്ടില് വോട്ടുചോദിക്കാനെത്താത്ത് എല്ഡിഎഫ് ചര്ച്ചയാക്കാന് ശ്രമിച്ചിരുന്നു.
