ജറുസലേമില് വെടിവെപ്പ്, ആറുപേര് കൊല്ലപ്പെട്ടു; ഭീകരാക്രമണമെന്ന് നെതന്യാഹു
ജറുസലേം: ഇന്ന് രാവിലെ ജറുസലേമില് നടന്ന വെടിവെപ്പില് ആറുപേര് കൊല്ലപ്പെടുകയും ഇരുപതോളം പേര്ക്ക് പരിക്കേല്ക്കുകയും ചെയ്തു. വെടിവെപ്പ് നടത്തിയ രണ്ട് അക്രമികളും കൊല്ലപ്പെട്ടു. ജറുസലേമിലെ റാമോട്ട് ജംഗ്ഷനില് വാഹനത്തിലെത്തിയ രണ്ട് അക്രമികള് ഒരു ബസിനുള്ളിൽ കയറി യാത്രികർക്ക് നേരെ വെടിയുതിര്ക്കുകയായിരുന്നുവെന്ന് ഇസ്രയേല് പോലീസ് പ്രസ്താവനയില് അറിയിച്ചു.
ബസ് സ്റ്റോപ്പിലുണ്ടായിരുന്ന ഒരു സൈനികനും ഏതാനും സാധാരണക്കാരും ആക്രമികളെ നേരിടുകയും തിരികെ വെടിയുതിര്ക്കുകയും ചെയ്തു. ഇതിലൂടെ അക്രമികളെന്ന് സംശയിക്കുന്ന രണ്ട് പേരും കൊല്ലപ്പെട്ടുവെന്നും പോലീസ് കൂട്ടിച്ചേര്ത്തു.
